कासिन न्यूज,
काठमाडौं ।
हालको वैदेशिक रोजगार ऐन प्रवद्र्धनभन्दा नियन्त्रणमुखी रहेको भन्दै धेरै अगाडिदेखि संशोधनको नेपाल वैदेशिक रोजगार व्यवसायी संघ माग गर्दै आएको छ । खासगरी ऐनमा रहेको वैदेशिक रोजगार व्यवसायीहरूको इजाजतपत्र नवीकरणका लागि वार्षिक एक सय जना कामदार अनिवार्यरूपमा पठाउनुपर्ने, वैदेशिक रोजगार व्यवसायीले ओरियन्टेसन तथा मेडिकल सञ्चालन गर्न नपाउनेजस्ता प्रावधानलाई खारेज गर्न माग गर्दै आएको छ ।
श्रम, रोजगार तथा सामाजिक सुरक्षा मन्त्रालयले वैदेशिक रोजगार ऐन २०६४ मा संशोधनका लागि छलफल अघि बढाएको छ ।
संघका महासचिव मेघनाथ भुर्तेलले बुधबार संघको कार्यालयमा संघलाई छातासंस्था मान्दै आएका विभिन्न राजनीतिक दल निकट, जातीय तथा भेगीय संस्थाका अध्यक्ष तथा महासचिवहरूसँग ऐनमा गर्नुपर्ने संशोधनका सम्बन्धमा सुझाव लिने तयारी भै रहेको बताए ।
संघले ऐन संशोधनको विषय दीर्घकालीनरूपमा सहज बनाउन पहल गर्ने भन्दै गत शुक्रबार वरिष्ठ अधिवक्ताद्वय शम्भु थापा तथा शम्भु निरौला र अधिवक्ता देवराज कटुवाललाई कानूनी सल्लाहकारमा मनोनयन गरेकोे थियो ।
वैदेशिक रोजगार विभागका तत्कालीन महानिर्देशक शेषनारायण पौडेलले कामदार पठाउने मुलुकले श्रम स्वीकृति दिने नभई कामदार लिने मुलुकले श्रम स्वीकृति दिने अभ्यास रहेकाले वैदेशिक रोजगार ऐनमा सोही अनुसारको संशोधन गरिनुपर्ने सुझाव राखेका थिए ।