कासिन न्यूज,
काठमाडौं ।
सरकारी फोनमा राखिएको संवेदनशील डाटा चिनियाँ सरकारले आफ्नो स्वामित्वमा रहेको टिकटकबाट पहुँच गर्न सक्ने भन्दै बेलायती सरकारले आफ्ना मन्त्रीहरूलाई सामाजिक सञ्जाल एप टिकटक आफ्नो कामका फोन र डिभाइसहरूमा प्रयोग गर्न प्रतिबन्ध लगाएको छ।
यसैबीच चीनले टिकटकले प्रयोगकर्ताको डाटा चिनियाँ सरकारलाई हस्तान्तरण हुने कुराको खण्डन गरेको छ। लन्डनस्थित चिनियाँ दूतावासले बेलायती सरकारको यो कदम तथ्यको सट्टा राजनीतिबाट प्रेरित भएको भन्दै बेलायतको व्यापारिक वातावरणमा अन्तर्राष्ट्रिय समुदायको विश्वासलाई कमजोर बनाउने काम गरेको बताएको छ।
अमेरिका र युरोपेली युनियनलाई पछ्याउँदै सरकारी उपकरणमा भिडियो सेयरिङ एप प्रतिबन्ध लगाउन प्रधानमन्त्री ऋषि सुनकलाई सांसदहरूले सुझाव दिएका थिए।
सोमबार संयुक्त राज्य अमेरिकाको भ्रमणका क्रममा सुनकले सरकारले उपकरणहरूको सुरक्षालाई गम्भीरतापूर्वक लिएको भन्दै आफ्ना सहयोगीहरूले के गरिरहेका छन् भनेर हेरिरहेको बताएका थिए।
आधिकारिक उपकरणहरूमा एपको बेलायती प्रतिबन्धलाई युरोपेली सङ्घ र संयुक्त राज्य अमेरिकाले पनि पछ्याउने सम्भावना छ।
टिकटकको चिनियाँ मूल कम्पनी बाइटडान्सले बेइजिङबाट प्रभावित भएको दाबी अन्तर्राष्ट्रिय समुदायले गर्दै आएका छन्।
चीनको बाइटडान्सको स्वामित्वमा रहेको टिकटक लामो समयदेखि चीनमा डाटा नराख्ने वा बेइजिङसँग साझेदारी नगर्ने स्पष्ट पार्दै आएको छ।

यसैबीच बेइजिङस्थित विदेश मन्त्रालयले वासिङ्टनलाई टिकटकलाई ‘अनुचित रूपमा दबाउने’ काम बन्द गर्न आग्रह गरेको छ।
टिकटकले अमेरिकाको राष्ट्रिय सुरक्षालाई खतरामा पार्छ भन्ने प्रमाण प्रस्तुत गर्न अमेरिका अहिलेसम्म असफल भएको प्रवक्ता वाङ वेनबिनले भने।
वी आर सोशल मार्केटिंग एजेन्सीका अनुसार एक अर्बभन्दा बढी सक्रिय प्रयोगकर्ताहरूको साथ यो विश्वमा छैटौं सबैभन्दा बढी प्रयोग गरिएको सामाजिक प्लेटफर्म हो ।
यद्यपि मेटाको फेसबुक, ह्वाट्सएप र इन्स्टाग्रामको लामो समयदेखिको ख्यातीलाई अझै टिकटकले भेट्न सकेको छैन तर युवाहरूमा यसको वृद्धिले यसको प्रतिस्पर्धीहरूलाई धेरै पछाडि पार्ने निश्चित देखिएको छ ।

वालरु एजेन्सीका अनुसार टिकटक प्रयोगकर्तामध्ये एक तिहाइ १० देखि १९ वर्ष उमेर समूहका छन्। यसको तीव्र वृद्धिले गत वर्ष विज्ञापन राजस्वमा ११ अर्ब अमेरिकी डलरभन्दा बढी योगदान गरेको थियो। यो एक वर्षमा तीन गुणाभन्दा बढीको वृद्धि हो ।