कासिन न्यूज,
काठमाडौं ।
नर्वेली फरवार्ड एर्लिङ ब्राउट हालान्डको ह्याट्रिक सहयोगमा सानदार जित निकाल्दै म्यानचेस्टर सिटी एफए कपको सेमिफाइनलमा प्रवेश गरेको छ ।
सिटीले च्याम्पियनसिप क्लब बर्नलेमाथि ६–० को सानदार जित निकाल्दै अन्तिम चारमा स्थान पक्का गरेको हो । सिटीको जितमा हालान्डले ह्याट्रिक पूरा गर्दा जुलियन अल्भारेजले दुई तथा कोल पाल्मेरले एक गोल थपे ।
इतिहाद स्टेडियममा शनिबार राति भएको एकपक्षीय खेलमा सिटीले पहिलो हाफमा २–० को अग्रता बनाउँदा दोस्रो हाफमा ४ गोल थपेको थियो ।
३२औं मिनेटमा हालान्डको गोलबाट सिटीले खेलमा १–० को अग्रता लिन सफल भयो । उनले अल्भारेजको पासमा गोल गर्न सफल भए । ३५औं मिनेटमा हालान्डले व्यक्तिगत र टोलीका लागि दोस्रो गोल गरेपछि सिटी पहिलो हाफमा २–० ले अघि बढ्यो । उनले फिल फोडेनको पासलाई सदुपयोग गरे ।
५९औं मिनेटमा हालान्डले ह्याट्रिक पूरा गरे । गोल मेसिन हालान्डको यो पछिल्लो दुई खेलमा लगातार ह्याट्रिक हो । यसअघि हालान्डले च्याम्पियन्स लिगको प्रि–क्वाटरफाइनलको दोस्रो लेगमा जर्मन क्लब आरबी लाइप्जिगमाथि ७–० को जितमा ह्याट्रिकसहित ६ गोल गरेका थिए ।

६२औं मिनेटमा केभिन डि ब्रुएनाको पासमा जुलियन अल्भारेजले गोल गरेपछि सिटी खेलमा ४–० ले अघि बढ्यो । ६८औं मिनेटमा कोल पाल्मेरले तथा ७३औं मिनेटमा अल्भारेले ब्रुएनाको पासमा व्यक्तिगत दोस्रो तथा टोलीका लागि छैटौं गोल गर्दै सिटीलाई फराकिलो जित दिलाए ।