कासिन न्यूज,
काठमाडौं ।
सोमबार संसद् भवनस्थित ल्होत्से हलमा बसेको नेकपा एमालेको संसदीय दलको बैठकलाई सम्बोधन गर्दै एमाले अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्ड प्रधानमन्त्री बनेको भोलिपल्टबाटै इमान बिर्सिएर अस्थिरतातर्फ गएको आरोप लगाए । अध्यक्ष ओलीले पार्टीमा दाहाल जंगबहादुर झै रहेको उल्लेख गरे ।
उनले प्रधानमन्त्री दाहाल राष्ट्रिय शक्तिलाई कमजोर पार्ने योजनामा रहेको आरोप पनि लगाए । उनले प्रधानमन्त्री दाहालले वैदेशिक सम्बन्धलाई अविश्वसनीय बनाएको बताए ।
अध्यक्ष ओलीले मित्र राष्ट्रसँग नेपालको सम्बन्ध बिग्रिनुको कारण प्रधानमन्त्री रहेकाले प्रधानमन्त्रीलाई संसद्मा विश्वास गर्न नसकिने स्पष्ट पारे । उनले गठबन्धनका स्वार्थीहरूले प्रधानमन्त्रीमा विश्वासको मत दिए पनि आफ्नो पार्टीले उनलाई विश्वासको मत नदिने बताए ।

अध्यक्ष ओलीले अब संसदीय समिति बन्न लागेकाले आफूले योगदान गर्नसक्ने समितिको चयन गर्न पार्टीका सांसदहरूलाई आग्रह गरे ।