कासिन न्यूज,
काठमाडौं ।
नेपाली कांग्रेसका नेता एवं सांसद डा. चन्द्र भण्डारीले अहिले सामान्य आहार खान सुरु गरेका छन् । बुद्धनगरस्थित निवासमा गत फागुन ३ गते ग्यास लिक भई आगलागी हुँदा सांसद भण्डारी घाइते भएका भण्डारीलाई सुरूमा कीर्तिपुरस्थित अस्पतालमा लगिएको थियो । त्यसपछि थप उपचारका लागि भारत लगियो । गत फागुन ४ गतेदेखि भारतको मुम्बईस्थित नेशनल बर्न सेन्टरमा उनको उपचार भइरहेको छ।
अहिले सांसद भण्डारीको स्वास्थ्यमा क्रमिक रूपमा सुधार आएको कुरा चिकित्सकहरूलाई उद्धृत गर्दै दाजु मीनप्रसाद भण्डारीले कासिनलाई बताए। ‘स्वास्थ्यमा सुधार भइरहेको, कलमी गरेको छालाले पनि राम्रो प्रतिक्रिया दिएको र अनुहारको छाला राम्रो हुँदै गएको डाक्टरहरूले जानकारी दिनुभएको छ,’ उनले भने, ‘फिजियोथेरापी जारी राखिएको छ।’

सांसद भण्डारीको जलन भएका ठाउँका छाला पनि राम्रो हुँदै गएकोले तत्काल शल्यक्रिया गर्नुनपर्ने चिकित्सकहरूले बताएका छन्। सांसद भण्डारी अरूको सहयोगबिना केही समय बस्न सक्छन्।
केही दिनमा उनलाई हिँड्नका लागि प्रयास गराइने पनि चिकित्सकहरूको तयारी छ । सांसद भण्डारीको उपचारमा सरकारले सहयोग गर्ने बताएको छ।