कासिन न्यूज,
काठमाडौं ।

बहुक्षेत्रीय प्राविधिक तथा आर्थिक सहयोगका बंगालको खाडीको प्रयास (बिम्स्टेक)को छैटौं शिखर सम्मेलनमा भाग लिन थाइल्यान्डको बैंककमा रहेका प्रधानमन्त्री केपी शर्मा ओलीको भारतीय प्रधानमन्त्री नरेन्द्र मोदीसँग भेटवार्ता हुने भएको छ ।

परराष्ट्र मन्त्रालयका एक बरिष्ठ अधिकृतका अनुसार शिखर सम्मेलनका दौरान दुई मुलुकका प्रधानमन्त्री बिच शुक्रवार साइडलाइन वार्ता हुने तय भएको हो ।हामीले भेटघाटका लागि भारतीय प्रधानमन्त्रीसँग समय मागेका थियौं । भारतीय प्रधानमन्त्री सम्मेलनमा सहभागी हुने कुरा तय भएपछि मोदी र ओलीबीचको भेटवार्ता पनि तय भएको हो,’ ति अधिकृतल भने ।

यसअघि संयुक्त राष्ट्रसंघको महासभाका क्रममा अमेरिकाको न्यूयोर्कमा गत असोज ७ मा दुई देशका प्रधानमन्त्रीबीच औपचारिक भेटवार्ता भएको थियो । त्यसबेला ३० मिनेट दुई प्रधानमन्त्रीबीच कुराकानी भएको थियो ।सो वार्ताअघि तथा पछि पनि प्रधानमन्त्री ओलीले भारतीय समकक्षीबाट भारत भ्रमणको निम्तो कुरिरहेका छन् । तर, हालसम्म भारतले भ्रमण तय गरेको छैन ।

प्रधानमन्त्री ओलीले भने न्यूयोर्कमै मोदीलाई नेपाल भ्रमणको निम्तो दिएका थिए । त्यसबेला मोदीले चाँडै नेपाल भ्रमण गर्ने बताए पनि उनको भ्रमण पनि तय हुन सकेको छैन । नेपालले आगामी जेठमा काठमाडौंमा गर्न लागेको सगरमाथा संवादमा भाग लिन पनि मोदीलाई निम्ता पठाएको छ ।

तर, त्यस बैठकमा मोदी सहभागी हुने नहुने तय भएको छैन । प्रधानमन्त्री ओलीले शुक्रवारको भेटमा मोदीलाई सगरमाथा संवादमा सहभागिताका लागि प्रत्यक्ष रुपमा अनुरोध गर्ने अपेक्षा गरिएको छ । सो भेटवार्ताका क्रममा ओलीको बहुप्रतिक्षित भारत भ्रमणबारे ठोस उपलब्धि पनि हुनसक्ने नेपाली अधिकारीहरु बताउँछन् ।